Bananning organizm uchun foydali xususiyatlari

Odatda olmani koni foyda deyishadi, lekin aslida banan ancha foydaliroq. Chunki unda ko‘proq vitaminlar va boshqa foydali moddalar bor.

  — Manba: «Daryo» nashri.

Foto: Harper’s Bazaar

Agar banan olma bilan taqqoslansa, bananda A vitamini temirdan besh barobar ko‘p, shuningdek, fosfor ham uch barobar ortiq. Bundan tashqari, kaliy, kletchatka, tabiiy shakar, C vitamini mavjud.

Banan qondagi glyukoza miqdorini sog‘lom saqlashga yordam beradi. Ba’zida bananni “super mahsulot” deb ham atashadi. Xo‘sh nima uchun bu meva ratsionga qo‘shilishi kerakligini quyida ma’lum qilamiz.

Jig‘ildon qaynashini bartaraf etadi

Noto‘g‘ri ovqatlanish  ko‘pincha jig‘ildon qaynashiga olib keladi. Banan mevasi oshqozon kislotasini zararsizlantirishga yordam beradi va leykotsianidin deb nomlangan o‘simlik tarkibidagi modda oshqozon shilliq qavatining qalinlashishiga olib keladi.

Quvvatni oshiradi

Bananlarda suv kam, boshqa mevalarga qaraganda kaloriya va shakar miqdori yuqori. Saxaroza, fruktoza va glyukoza kletchatka bilan birgalikda quvvatni oshiradi. Jismoniy mashqlar paytida kaliy miqdori tufayli tomir tortishishi xavfi kamayadi. Banan — jismoniy mashg‘ulot oldidan iste’mol qilinadigan eng yaxshi meva sifatida tavsiya etiladi.

Kayfiyatni ko‘taradi

Banan tarkibida yaxshi kayfiyat uchun mas’ul bo‘lgan serotoninga aylanuvchi aminokislotalar — triptofan bor. Bu birikmalar dam olishga, tashvishlanishni kamaytirishga va hatto baxtni his qilishga yordam beradi. Qondagi triptofan darajasini oziq-ovqat yordamida ko‘tarish qiyin bo‘lsa-da, lekin banan bu vazifani a’lo darajada bajaradi.

Tabiiy kollagen

Banan tarkibida marganets ham bor, u tanaga kollagen ishlab chiqarishga yordam beradi, shuningdek, terini erkin radikallardan himoya qiladi.