Pishloqli sous qo‘shib tayyorlanadigan tovuqli frikadelka mazali ta’mga ega. Uni makaron bilan qo‘shib iste’mol qilishingiz mumkin. Ko‘katlar yegulikka o‘zgacha ta’m beradi.
— Manba: «Daryo» nashri.
Frikadelka uchun kerakli mahsulotlar:
- ezilgan non bo‘laklari — 90 g
- qaymoq — 120 ml
- parmezan yoki boshqa turdagi pishloq — 50 g
- tuxum — 1 dona
- sarimsoq — 2-3 donacha
- tovuq go‘shtidan qilingan qiyma — 900 g
- tuz — 2 choy qoshiq
- murch — yarim choy qoshiq
- sariyog‘ — 30-40 g
- o‘simlik yog‘i — 1 osh qoshiq
Sousga solinadigan masalliqlar:
- sarimsoq — 1 donacha
- parmezan yoki boshqa turdagi pishloq — 70-90 g
- sariyog‘ — 70 g
- un — 1 osh qoshiq
- qaymoq — 450 ml
- tuz — ta’bga ko‘ra
Tayyorlanishi:
- Ezilgan non bo‘laklarini qaymoq bilan aralashtiring. Parmezanni mayda tishli qirg‘ichdan o‘tkazing. Tuxumni ozgina ko‘pirtiring. Sarimsoqni maydalang.
- Mahsulotlarga qiyma, tuz, murch qo‘shing va aralashtiring. Dumaloq frikadelkalarni hosil qiling.
- Idishga sariyog‘ va o‘simlik yog‘ini solib qizdiring. 8-10 daqiqa davomida frikadelkalarni qovuring. Ularni tarelkaga soling va ustini folga bilan o‘rang.
- Sarimsoqni qirg‘ichdan o‘tkazing va pishloqni mayda qilib to‘g‘rang.
- Qizdirilgan idishga sariyog‘ni solib eritib oling. Ta’mni yaxshilash uchun sarimsoqni yarim daqiqa davomida qovuring.
- Elakdan o‘tkazilgan unni soling. Aralashtirib, taxminan 3 daqiqa qovuring.
- Qaymoq va tuzni soling va aralashtirishda davom eting, sousni yana 5-7 daqiqa davomida pishiring. Uni olovdan olib pishloq bilan aralashtiring.
- Frikadelkalarni idishga soling qaymoqli sous bilan aralashtirib oling.
Yoqimli ishtaha!
