Sabzavotlar bilan to‘ldirilgan qovoqli taom mazali ta’mga ega. Uni o‘zingizga yoqqan ko‘katlar bezatsangiz ham bo‘ladi. Qovoqli taomni kechki ovqatlanishda tayyorlab oila a’zolaringizni xursand qilishingiz mumkin.
— Manba: «Daryo» nashri.
Kerakli masalliqlar:
- tovuq filesi — 500-600 g
- kartoshka — 2-3 dona
- sabzi — 1 dona
- qo‘ziqorin — 100-200 g
- piyoz — 1 dona
- qovoq — 1 dona
- o‘simlik yog‘i — 3 qoshiq
- tuz — ta’bga ko‘ra
- murch — ta’bga ko‘ra
- ziravorlar — ta’bga ko‘ra
- pishloq — ta’bga ko‘ra
Tayyorlanishi:
- Tovuq filesi, kartoshka, sabzi va qo‘ziqorinlarni o‘rtacha kattalikdagi bo‘laklarga bo‘lib oling. Piyozni maydalang.
- Qovoqning yuqori qismini kesib oling va ichidagi urug‘larni olib tashlang. Ichki qismi kattaroq bo‘lishi uchun qovoqning mag‘zini qoshiq bilan olib tashlang.
- O‘simlik yog‘ini o‘rtacha olovda qizdirib oling. Tovuq go‘shti bo‘laklarini har tomondan qovuring. Unga tuz, murch va ziravorlar qo‘shing.
- Go‘shtga piyoz, qo‘ziqorinni qo‘shing va yana 3-4 daqiqa davomida qovuring. Ustiga kartoshka, sabzi va to‘g‘ralgan qovoq mag‘zini qo‘shing. Mahsulotlarni o‘rtacha olovda 10 daqiqa davomida idishning qopqog‘ini yopib pishiring.
- Qovoqning ichiga qovurilgan mahsulotlarni soling. Qovoqning ustini kesilgan bo‘lagi bilan yoping va 40-50 daqiqa davomida 180 daraja haroratda qizdirilgan pechda pishirib oling.
- Taom tayyor bo‘lishdan 10 daqiqa oldin qovoqning ustidagi bo‘lakni olib tashlang va mahsulotlarning ustiga maydalangan pishloq seping.
Yoqimli ishtaha!
