Kartoshka va piyozdan tayyorlanadigan kotletlar juda yumshoq va shu bilan birga mazali ta’mga ega bo‘ladi. Ularga pomidor qaylasi yoki smetana qo‘shib iste’mol qilishingiz mumkin.
— Manba: «Daryo» nashri.
Kerakli masalliqlar:
- kartoshka — 1 kg
- tuz — ta’bga ko‘ra
- piyoz — 4 dona
- o‘simlik yog‘i — 6 qoshiq
- tuxum — 1 dona
- murch — ta’bga ko‘ra
- un — 6-7 qoshiq
Tayyorlanishi:
- Kartoshkani taxminan 10-15 daqiqa davomida ozgina tuz qo‘shilgan suvda pishganicha qaynatib oling. Sovigandan so‘ng kartoshkalarni katta tishli qirg‘ichdan o‘tkazing.
- Piyozni maydalang. Unga yog‘ning yarmini qo‘shib yumshoq bo‘lguncha va yengil qizarguncha qovuring. Piyozni sovitishga qo‘ying.
- Kartoshkani piyoz va tuxum bilan aralashtiring, unga ozgina tuz va murch qo‘shing. Ustiga un soling va yana aralashtiring.
- Mahsulotlar aralashmasini kichik kotletlar shakliga keltiring. Ta’bga qarab, un, non bo‘laklari yoki makkajo‘xori yormasini soling.
- Kotletlarni yog‘ solingan tovada ikkala tomoni qizarguncha qovuring.
Yoqimli ishtaha!
