Ushbu fotosuratlarga qarab, evolyutsiya bizning qiyofamizni an’anaviy tushunchadagi go‘zallikni takomillashtirish yo‘lidan borishiga shubha qilish mumkin, ammo tabiat bilan bahslashib bo‘lmaydi.
Manba: «Mail.ru Hi-Tech».
Hi-Tech Mail muallifi
Zamonaviy inson evolyutsiyaning cho‘qqisi bo‘lib tuyulishi mumkin, ammo olimlar o‘zgarishlar jarayoni yakunlanishdan yiroq ekanligiga ishonishadi. Texnologiyalar, o‘zgarib borayotgan iqlim va koinotni o‘zlashtirishning ta’siri kelajakda odamlarning qiyofasi bugungisidan keskin farq qilishiga olib keladi. Sun’iy intellekt tadqiqotchilar bilan birgalikda hozirdanoq avlodlarimiz qanday ko‘rinishga ega bo‘lishini bashorat qilishga urinmoqda.
Olimlarning bashoratlari shuni ko‘rsatadiki, ming yildan keyin odamlarning bo‘yi pastroq bo‘lib qoladi. Bu evolyutsion saralashda endi eng chidamli emas, balki eng ko‘p pusht beradiganlar ishtirok etayotgani bilan bog‘liq. Olimlarning taxmin qilishicha, erta jinsiy balog‘atga etish past bo‘ylilik bilan bog‘liq, demak, tabiat kelajakda past bo‘yli odamlarning yetarlicha bo‘lishi haqida qayg‘uradi.
Ikkinchi sezilarli o‘zgarish tashqi ko‘rinishga tegishli. Millatlararo nikohlarning ko‘payishi sababli irqlar o‘rtasidagi chegaralar o‘chib bormoqda, bu esa olimlarning fikricha, bir xillashgan tashqi ko‘rinishga olib keladi. Kelajakdagi o‘rtacha inson, ehtimol, quyosh nurlanishiga moslashish bilan bog‘liq bo‘lgan to‘qroq teriga ega bo‘ladi. Tadqiqotchilarning ta’kidlashicha, mo‘ljal sifatida Braziliya yoki Mavrikiy kabi zamonaviy ko‘p madaniyatli mamlakatlar aholisini ko‘rib chiqish mumkin.
Bundan tashqari, jamiyatning rivojlanishi va ayollar o‘rtasida tanlov erkinligining ortishi hisobiga jinsiy saralash kuchayadi. Bu shuni anglatadiki, jozibaliroq odamlar o‘z genlarini avlodlariga o‘tkazish ehtimoli yuqoriroq bo‘ladi. Ehtimol, kelajakda odamlar kelishganroq bo‘lishadi va ularning intellekti ortadi, chunki tashqi ko‘rinish va aqliy qobiliyatlar — juft tanlashning eng muhim omillaridan biridir.
Yana bir yangilik — texnologiyalarning organizmga joriy etilishidir. Hozirdanoq birinchi kiberneptik qurilmalar paydo bo‘lmoqda. Kelajakda gen muhandisligi tashqi ko‘rinishni tuzatishga, maxsus implantlar esa organizm imkoniyatlarini kengaytirishga imkon beradi. Ehtimol, odamlar takomillashtirilgan tuyg‘u a’zolarining egalariga aylanib, bu ularni atrof-muhitga ko‘proq moslashgan qiladi.
Qiziqarlisi, olimlar teskari jarayonlarni ham — miyaning kichrayishini bashorat qilmoqdalar. Raqamli texnologiyalar asri katta hajmdagi ma’lumotlarni eslab qolish ehtiyojini kamaytiradi, bu esa uzoq muddatli istiqbolda intellektga ta’sir qilishi mumkin. Shunga o‘xshash jarayonlar xonakilashtirilgan hayvonlarda, masalan, yovvoyi ajdodlariga qaraganda miyasi kichraygan itlar va qo‘ylarda allaqachon kuzatilmoqda.
O‘zgarishlar qomatga ham ta’sir qilishi istisno etilmaydi. Vaqtining ko‘p qismini ekran qarshisida o‘tkazadigan inson bukrroq orqaga ega bo‘ladi, uning qo‘llari esa gadjetlardan doimiy foydalanish sababli qiyshayadi. Ba’zi tadqiqotchilar, shuningdek, kelajakda uyqu yetishmasligi sababli odamlar yuzning shishishi, zaif immun tizimi va mushaklar distrofiyasi kabi surunkali muammolarga duch kelishini taxmin qilishmoqda.
Evolyutsiyaning yana bir mumkin bo‘lgan tarmog‘i koinotni o‘zlashtirish bilan bog‘liq. Boshqa sayyoralarga ko‘chib o‘tgan avlodlar noyob fiziologik xususiyatlarga ega bo‘lishlari mumkin. Masalan, pasaytirilgan tortishish kuchi sharoitida ular uzunroq bo‘lib, uzun qo‘l-oyoqlarga ega bo‘lishadi. Shuningdek, yangi yoritish sharoitlariga moslashish uchun teri pigmentatsiyasi va ko‘zlar tuzilishida o‘zgarishlar bo‘lishi mumkin. Agar alohida koloniyalar ajralib qolsa, vaqt o‘tishi bilan ular yangi biologik turga aylanadi.
Texnologiyalarning rivojlanishi va evolyutsiya yonma-yon boradi. Ming yildan keyin tashqi ko‘rinishimiz shunchaki biologik jihatdan boshqacha bo‘lib qolmay, balki o‘zimiz ko‘nikgan tasavvurlarimizga to‘liq mos kelmay qolishi istisno etilmaydi. Yangi chorlovlar va kashfiyotlar bugungi kunda fantastika bo‘lib tuyuladigan, ammo kelajakda odatiy hol sifatida qabul qilinishi mumkin bo‘lgan noyob xususiyatlarning paydo bo‘lishiga olib keladi.
Avvalroq biz Xalqaro go‘zallik kuni qanday o‘ylab topilgani haqida yozgan edik.
