Сериаллар кўпми?
Сиз уларни барчасини кўриб, ишдан, уйқудан қолмаяпсизми?
Хўш унда, айтингчи, сиз нима учун кўпинча уларни барчасини кўрмоқчи бўласиз? Ахир инсон хаётдан ўзига керакли нарсаларнигина, меъёри билан олиши керак эмасми?
Одатда Сиз ўзингизга кийим-кечак сотиб олганда кераклисини, ёқтирган либосларингизни харид қиласиз. Ошхона-кафеларга кирганда хам ўзингиз маъқул кўрган таомларга буюртма берасиз. Лекин….
…. Сериалларни бир-бошдан, бирин-кетин кўра бошлайсиз. асло чарчадим демайсиз. Сериал қахрамонларига қўшилиб гохо қайғурасиз, гохо шодланасиз, гохида эса йиғлагудек бўласиз. Ахири телевизор чарчаганиданми, ёки оила аъзоларингизга рахми келганиданми, телевизор бирданига қоп-қорайиб, кўрсатмай қолади. Хайриятки, шундагина ўрнингиздан туриб, мактабдан қайтган фарзандингиз ўз вақтида овқатланиб, дарс қилиш ўрнига, назоратсиз қолганидан фойдаланиб, компьютердан бош кўтармай ўйин ўйнаётганини кўрасиз. Боғчадан қайтган ўғлингиз эса, кийимини хам алмаштирмай, кўчада ўйнаб юрган бўлади. Ишдан чарчаб келган турмуш ўртоғингизни эса, газ плитасида ичи бўм-бўш турган қозонни кўриб, энсаси қотади…
Шоша-пиша апил-тапил уриниб, бирон-бир тезроқ тайёр бўладиган таомни тайёрлашни бошлайсиз. Мазалироқ овқат ейишни ният қилиб келган турмуш ўртоғингизни ич-дами ичида қолади. Муроса учун у хам сизга хеч нарса демайди, ичидагини ичига ютади. Бошқача қилиб айтганда, таомни қозонга соласизу, бир оздан кейиноқ сузиб келиб, оила аъзоларингизга тақдим қиласиз. Лекин бу сафарча, шундай бўлади.Хеч ким жанжал кўтармайди. Хамма сукут сақлаб, оғзига талқон солиб олади. Кейинги сафарчи?….Кўза кунида эмас, балки…..
Азиз бекажонлар! Хар нарсанинг ўз меъёри, чек-чегараси борлигини асло унутманг. оила аъзоларингиздан мехрингизни аяманг. Уларни мазали таомлар билан хушнуд қилинг. Бунинг учун эса, ўз хиссиётларингизни жиловлаб, сериалларни фақат бўш вақтингизда кўришга одатланинг.
Хатто Англиянинг собиқ бош вазири мархума Маргарет Тэтчер хам — соат 12 га яқинлашганда, хукумат йиғилишини тўхтатиб, танаффус эълон қилиб, сўнгра севимли турмуш ўртоғи учун таом тайёрлашга киришган экан.
Шунинг учун , уйда сиз хам телевизор қучоғига ўзингизни отишдан олдин, Маргарет Тэтчер оила аъзоларига таом тайёрлаш учун хатто хукумат йиғилишини хам бир фурсатга тўхтатганлигини унутмаган холда, арзимаган сериалларингизни кейинроққа қолдириб, «Уй бекаси» дек маъсулиятли вазифангизни муваффаққият билан адо этасиз деб умид қиламиз!
МУАЛЛИФ
