«Гўзал бўлиб эмас, бахтли бўлиб туғил!», деган ибора кўпчиликка маълум. Дунё бўйлаб гўзаллик танловларида ғолиб бўлган айрим қизларнинг тақдири нега аянчли ҳолда якунланди? Улар узоқ ва бахтли ҳаётни гўзалликка алмаштирган эдими?
Моника Спир, Венесуэла гўзали — 2004 йил
Фото: Pinterest
Мафтункор Моника 2004 йилда Венесуэланинг энг гўзал аёлига айланган ва 2005 йилда «Дунё гўзали» танловида иштирок этган — деб бу хақда «Daryo» нашри хабар беради. Ўша вақтда 5 ёшли қизининг отаси — 39 ёшли британиялик Томас Берри билан расман ажрашган бўлса-да, у билан яқин муносабатда эди. Жуфтлик АҚШда яшар, фақатгина байрам ва таътилларда Венесуэлага келиб турган. 2014 йил ана шундай саёҳатларнинг бирида, Янги йил байрамида улар автоҳалокатга учрайди, аммо полицияни кутаётган жуфтликка кутилмаган хавф — маҳаллий безорилар учрайди. Йўл четидаги қимматбаҳо машина безорилар эътиборини тортгани учун улар дарҳол Моника ва Томасни воқеа жойида отиб ўлдиради. Уларнинг қизи эса мўъжизавий тарзда омон қолади. Бир неча дақиқадан сўнг етиб келган полиция уларни ҳибсга олган. Венесуэла президенти Николас Мадуро ушбу фожиани «ўн йиллик» йўқотиш деб атаган ва терговни шахсан ўзи назорат қилган.
Мария Хосе Альварадо, Гондурас гўзали — 2014 йил
Фото: Cosmopolitan
19 ёшли Мария Хосе Альварадо синглиси София билан унинг яқин дўстининг туғилган кунини нишонлашга борган. Шундан сўнг опа-сингиллар уйга қайтмаган. Тергов жараёнида туғилган кун эгаси — Плутарко Руис шубҳали кўринган. У одам ўғирлашда гумонланиб, ҳибсга олинганида икки марта қотиллик қилганини тан олган. Опа-сингилларнинг жасади эса дарё бўйида кўмилган ҳолда топилган. Маълум бўлишича, Руис зиёфатда София билан унинг дўстига ноз-карашма қилганликда айблаб, жиддий жанжаллашган. Сўнгра ғазабда унга ўқ узган, бунга унинг опаси Мария гувоҳ бўлган. Натижада унга ҳам қарата ўқ узилган. Афсуски, Руис қурбонларни кўмайотган вақтда Мария «Дунё гўзали» танловида иштирок этиш учун Лондонга учиши керак эди. Қурбонларнинг оиласига ҳурмат сифатида мамлакат Мариянинг ўрнига бошқа номзод беришдан бош тортган ва мусобақа ўтказиб юборилган.
Агнешка Котлярска, Халқаро гўзаллик танлови ғолибаси — 1991 йил
Фото: Cosmopolitan
1990 йилларда Агнешка Польшанинг энг гўзал қизи деб эътироф этилганида, унинг ҳаётида Ежи исмли эркак пайдо бўлган. Ушбу махфий мухлис моделни бир вақтнинг ўзида ҳам таъқиб қилар, ҳам севги изҳорлари билан таҳдид қилар эди. У ҳеч қачон тўғридан-тўғри алоқага чиқмаганлиги туфайли 6 йил давомида модель унга эътибор ҳам бермаган. Аммо Агнешканинг никоҳи барчасини ўзгартириб юборган. Ежининг сўзларига кўра, ҳаётини барбод қилган қиздан, албатта, қасос олиниши керак бўлган. У бунинг учун моделнинг оиласи яшайдиган уй атрофида соатлаб изғир ҳамда улар ҳақидаги маълумотларни тўплар эди. 1996 йил жуфтлик ўз машинаси томон ҳаракатланганида бирдан Ежи пайдо бўлган ва Агнешканинг турмуш ўртоғи — Ярославга пичоқ урган. Оёғидан яраланган турмуш ўртоғига ёрдамга шошилган Агнешкага ҳам муваффақиятсизликдан ғазабланган қотил ташланиб, кўксига 4 марта пичоқ урган. 36 ёшлик дастурчи шу куни полиция томонидан ҳибсга олинган ва 14 йилга озоликдан маҳрум этилган.
Александра Петрова, Россия гўзали — 1996 йил
Фото: Cosmopolitan
Александранинг ҳаёти 2000 йилда якун топган. Икки жиноий гуруҳ ўртасидаги тўқнашувда қиз тасодифан отиб ўлдирилган. 90 йилларда Александра бозор директорининг ўринбосари бўлган жиноятчилар бошлиғи — Константин Чувилин билан алоқада бўлган. Чувилин ва унинг рақиби ўртасидаги зиддият туфайли ёлланган қотил ўз вазифасини Александра ва унинг дўсти бирга эканлигида амалга оширишқа қарор қилган. Икки гуруҳ орасидаги низода ўққа тутилган қиз шифохонага етиб бормасидан аввал вафот этган.
Светлана Котова, Россия гўзали — 1996 йил
Фото: Pinterest
Россияда миллий гўзаллик танловининг икки ғолибаси ҳам ўлдирилган. Светлана танловда иштирок этганидан кейин ўз тақдирини афсонавий қотил Александр Солоник билан боғлаган. Александр Янги йил байрамида қизни Грециядаги вилласига таклиф қилган. Светлана ҳайкал ва фавворалар, улкан боғ, хизмат кўрсатишнинг энг юқори даражасидан ҳайратга тушган. Ҳаттоки, ўлимидан бир кун олдин онасига қўнғироқ қилиб, жаннатда яшаётганини ҳам айтган. Афсуски, эртаси куни қуролланган бир гуруҳ одамлар виллага бостириб кириб, Александр билан «ҳисоб-китоб» қилган. Унинг жасади 1997 йил 2 февралда бўғиб ўлдирилган ҳолда топилган. Орадан уч ой ўтиб 22 ёшли Светлананинг жасади чамадонда бўлакланган ҳолда топилган. Қотиллар томонидан қисмларга ажратилган қурбон ўрмонга ташлаб кетилган эди.
Лайна Кеза, Африка гўзали — 2010 йил
Фото: Cosmopolitan
29 ёшли қора танли Африка гўзали 2013 йил август ойида пичоқлаб ўлдирилган. Қотил моделнинг уч ёшли қизининг отаси – Дэвид Кикав эди. Фожиадан бир неча кун аввал Лайна рашк ва қийноқлардан чарчаганини айтиб, Дэвид билан ажрашишга қарор қилган. Жуфтликнинг қўшнилари ҳам ҳамиша уларнинг уйида жанжал бўлишини, ҳақоратли сўзлар эшитилиб туришини тасдиқлаган. Бир куни тонгда қўшнилардан бири полицияга хабар бериб, уларнинг уйида даҳшатли қичқириқ эшитилиб, тўсатдан тўхтагани ҳақида хабар берган. Етиб келган полиция Дэвидни қўлидаги пичоқ билан ҳаммом остонасидан топган. Лайнанинг жасади эса ҳаммомда ётар эди.
Мелоди Гершбах, Халқаро гўзаллик танлови ғолибаси — 2009 йил
Фото: Pinterest
Тожни қўлга киритганидан бир йил ўтиб, филиппинлик гўзал Мелоди бахтсиз ҳодиса туфайли вафот этган. 2010 йил 21 августда ичида Мелоди бўлган машина катта тезлик билан автобусга бориб урилган. Ҳайдовчи дарҳол полицияга таслим бўлган. Унинг сўзларига кўра, транспорт воситаси техник носозлик туфайли бошқарувдан чиқиб кетган. Модель бор-йўғи 24 ёшда эди.
Генезис Кармона, Сайёҳлик гўзали — 2013 йил
Фото: Pinterest
Моника билан боғлиқ даҳшатли қотилликдан бир ой ўтиб, яна бир венесуэлалик гўзал вафот этган. Кармона Николас Мадуро ва унинг ҳукуматининг истеъфоси учун кўча намойишида қатнашган. У жиноятчилик ва турмуш даражасидан нолиб, Валенсия кўчаларида намойишга чиққан талабалар сафига қўшилган. Тўсатдан ўқ овози эшитилган ва қиз йиқилган. Ўқ унинг бошига теккан эди. Қиз тезда шифохонага олиб борилган, шаҳарни тартибсизликлар қамраб, яна бир неча киши ҳалок бўлган. Бироқ моделни ким отгани ҳануз номаълумлигича қолмоқда. Расмийлар ўқни мухолифат томонидан отилган, деб таъкидламоқда.
Микаэла МакАриви — Ирландия гўзаллик маликаси
Фото: Cosmopolitan
2011 йил январь ойида Жон МакАриви билан турмуш қурган Микаэла тўй саёҳати учун Маврикийга борган. Жуфтлик саёҳат вақтида меҳмонхонанинг ресторанига овқатланишга тушган. Шундан сўнг Микаэла қандайдир сабаб билан хонасига кирган ва у ерда меҳмонхонанинг икки ходими талон-торож қилиш учун кириб келганини кўрган. Улар моделни ҳаммомга судраб кириб, бўғиб ўлдирган. Бироқ етарли далиллар бўлмаганлиги туфайли суд ходимларни айбсиз деб топган.
Лесли Маццара, Жанубий Каролина гўзали
Фото: Cosmopolitan
2004 йил уч дугона — Лесли Маццара, Адриана Инсоня ва Лоурен Мианза Ҳеллоуин байрамини нишонлаган. Байрам туфайли чарчаган қизлар жуда кеч уйқуга ётган, аммо Лоурен ғалати товушлардан уйғониб кетган ва уйда ўғри борлигини билиб қолган. У полицияга қўнғироқ қилиш учун ташқарига чиқиб кетган ва уйга қайтмаган. Бу эса унинг ҳаётини сақлаб қолган. Полиция етиб келганида Лесли ва Адриана ўлик ҳода топилган. 218 нафар гумонланувчидан олинган ДНК намуналари жиноятчининг шахсини аниқлашга ёрдам бермаган, ҳаттоки 100 минг доллар мукофот пули ҳам. Лекин Лоурен бунинг тагига етган. У ҳодиса жойидаги суратларни кўриб чиқиб, тажрибали детективлар ўтказиб юборган тафсилотга эътибор қаратди: жуда камёб тамаки маркаси. Бундай тамакини Адриананинг дугонасининг эри — Эрик Коппл тутатар эди. Эркак ҳибсга олинган. Барча синов намуналари бир-бирига мос келган, аммо у шу кеча ўта маст эканлиги ва ҳеч нарса ёдида қолмаганини айтаверган. Гарчи у умрбод қамоқ жазосига ҳукм қилинган бўлса-да, қизларнинг нима учун ўлдирилганлигининг сабаби очиқланмаган.
