Туғилган кунинг билан,
Муборакбод этайин.
(Дўстим бўлганинг билан,
Сен барибир бетайин!).
Яхши тилакларимни,
Сенга қилай бахшида.
(Керакли эканимни,
Билиб қўйсанг яхшида…)
Сенга совға келтирдим,
Уни қиламан тақдим.
Бўлмасин деб бир ғовға,
Сарфлайман доим вақтим.
Сенга тилайман соғлик,
(Бу шифокорга боғлиқ!)…
Қадрдон дўстим салом,
Хўш, яхшими ишларинг?
(Энди хулласи калом,
«Сенга нима!» демагин).
Туғилган кунинг билан,
Табрикларим йўллайман.
Совға олмаганимдан,
Сендан узр сўрайман.
Келажакда албатта,
Ойлигим чиқса катта,
Ана ўшанда шартта,
Совға оламан битта!…
(Чунки биз хам хаётда,
Қолмайликда уятда!…)
Дўстим келдик мехмонга,
Қани «паловхон тўра»?
Сен хам ўхшаб мезбонга,
Мехмон қил ундан кўра.
Ташрифимиз ёқмаса,
Очиғини айта қол.
(Кеча берган пулимни,
Индамасдан қайта қол!)…
Қутлаб айёминг билан,
Тилагимиз бир талай.
Қалбимизнинг тўридан,
Жой олгансан, хар қалай.
Эъзозлаймиз, сен билсанг,
Чунки, пулинг кўп жуда.
Айтиб қўй, «банкрот» бўлсанг,
Биз юрмайлик бехуда!…
-«»Нега туғилган кунинг,
Тўрт йилда бир мартадир?».
-«Мендай зиқна одамнинг,
Ниятини айтадир!»…
-«Алло, ким бу? Ха, дўстим,
Нега йўқсан уйингда?
Гапирсам гапни ростин,
Шундай айём кунингда?»…
-«Алло, гапиринг, бу ким?,
Антеннангиз йўқ демак?»,
(Зиқналик сенга мухим,
Бу «хунар» сенга эрмак!)…
«Дўстим таваллуд кунинг,
Муборакбод қилайин.
Дўстнинг қадрига етгин,
Шу хақида сўйлайин:
-«Дўст — ачитиб гапирар,
Душман эса — кулдириб».
«Дўст — жон бериб гапирар,
Душман эса — ўлдириб!».
«Дўст — меъёрда ичирар,
Душман эса — тўлдириб!».
«Дўстинг — билдирмай алдар,
Душман эса — билдириб!«…
(Демак айрим пайтларда,
Дўстдан душман афзалда!)
Туғилган кунинг бугун,
Табриклайман қалбимдан.
«Захар ют — дўстинг учун!»,
Дейишади қадимдан.
Нима деган гап «захар»,
Дейман қараб кўзингга.
(Эсим жойида ахир,
Захар сийлов ўзингга!)…
Дўстим, амринг кутаман,
Мен тайёрман, хар нафас.
Хохласанг, мих ютаман,
Фақат, текин бўлса бас!…
Таваллуд айёмингда,
Қутлай барча номидан.
(Дўстлар совға ўрнига,
Пул беришса ёнидан,
Пулни кўриб дердингда,
«Бўларканку, жонидан!»).
Дўст билан обод уйинг,
Дейди доно халқимиз.
Бугун таваллуд кунинг,
Совғаларни элтамиз.
Кечки пайт уйингни биз,
«Обод» қилиб қайтамиз!…
(Ёки обод қилишни,
Қайтаётиб айтамиз!)…
Дўстим таваллуд кунда,
Сени табриклаб дилдан,
Шундай айём кунида,
Турсам дейман ёнингда.
Машойихлар айтадир,
«Дўст бўлсанг — ёнимда тур!».
(Кетган бўлсанг қайгадир,
Кеч қолсанг, ортимда тур!).
Бунинг сабаби шундай,
Дўст билинар кулфатда.
Базмда туриб бундай,
«Билинамиз» албатта!…
- Материаллар фақат шахсий мақсадларда фойдаланиш учун: Материаллардан тижорат мақсадларида фойдаланиш, тарқатиш қонун билан тақиқланади.
- «Муаллифлик хуқуқи ва турдош хуқуқлар тўғрисида» ги Ўзбекистон Республикаси Қонуни: № 42 сон, 20 июнь. 2006 йил.
© МУАЛЛИФ
