Yangi yil, shubhasiz, oila davrasida nishonlash uchun eng yaxshi bayramlardan biri hisoblanadi. Bu davra uchun Yangi yil shukuhini berib turuvchi filmlarning o‘rni juda katta. “Daryo” e’tiboringizga bayram kunlari tomosha qilib, bayramona kayfiyatda bo‘lish uchun eng sara filmlar ro‘yxatini taqdim etadi — deb bu haqda «Daryo» nashri xabar beradi.
10. “Santa Klaus” film seriallari
Ushbu “Santa Klaus” filmlari jami uch qismdan tashkil topgan bo‘lib, 1994–2006-yillar orasida Jon Paskvin va Maykl Lembek tomonidan suratga olindi.
Filmdan lavha
Filmlarda Tim Allen bosh rolda – Santa Klaus obrazini yaratdi. Film bosh qahramonning Yangi yilga yaqin haqiqiy qorboboga aylanib borishi bilan boshlanib, o‘zining vazifasi – bolalarga sovg‘a ulashishi bilan davom etadi. Yangi yilgacha dunyodagi barcha bolalarga sovg‘a ulashish yo‘lida esa bosh qahramon bir necha to‘siqlar, qiyinchiliklar va qarshiliklarga uchraydi.
Ushbu trilogiya barcha tomoshabinlarga bayram shukuhini bera olgani uchun klassik filmlar qatoridan joy oldi va qorbobolar haqida ishlangan eng yaxshi filmlar qatoriga kirdi.
9. “Ы operatsiyasi va Shurikning boshqa sarguzashtlari” filmi
“– Nima uchun «Ы» operatsiyasi?
– Hech kim bilmasligi uchun!”
Foto: Google Photos
Sovet davrida ishlangan ushbu klassik film Leonid Gayday tomonidan 1965-yil yaratildi. Film jami uchta turli komedik hikoyalar bilan davom etib, bosh qahramon – talaba Shurik (Aleksandr Demyanenko)ning qiziqarli sarguzashtlarini ko‘rsatib beradi. Ilk epizod Shurikning 15 sutka administrativ ishlarga hukm qilingan Fedya bilan qurilish maydonchasida yuz beradigan kulgili sarguzashtlari bilan davom etadi. Ikkinchi epizodda bosh qahramon bo‘lgan talabaning imtihonlar davrida yuz beradigan qiziqarli taqdiri bilan davom etadi. Uchinchi, so‘nggi epizodda esa bosh qahramon omborni tunash uchun yollangan bir guruh jinoyatchilarga qarshi turadi.
Ko‘plab teletomoshabinlarga yaqindan tanish bo‘lgan “Ы operatsiyasi” filmi o‘zidagi ajoyib va esda qolarli dialoglari bilan ham hanuzgacha muxlislarning eng sevimli kinokartinalaridan hisoblanadi.
8. “Yomon Santa” filmi
2003-yil Terri Svigoff tomonidan yaratilgan ushbu komediya klassik qorbobolar haqida ishlangan filmlardan tubdan farq qilib, hayotda omadi kelmagan va ichkilikka ruju qo‘ygan bosh qahramon – Villi (Billi Bob Tornton)ning Yangi yil arafasidagi sarguzashtlari bilan davom etadi. Villi qorbobo qiyofasida bolalardan ularning Yangi yil tilaklarini eshituvchi bo‘lib ishga kiradi va sherigi bilan u joyda o‘g‘rilik qilishni rejalashtiradi. Uning hayotiga o‘ta sodda bo‘lgan bola kirib kelganida, u asta-sekin o‘zgarishni boshlaydi.
Filmdan lavha
Film Santani ertaknamo qilib emas, haqiqiy hayotda uchrashi mumkin bo‘lgan odam tasvirida ko‘rsatgani uchun ham ko‘plab tomoshabinlarning yoqtirgan qorbobosiga aylandi.
7. “Klaus” animatsion filmi
Ispaniyalik rejissyor Serxio Pablosa tomonidan 2019-yil ishlangan, an’anaviy qorbobolar tarixidan farq qiluvchi yangicha animatsion film. Undagi voqealar XIX asr ko‘rinishida tasvirlanib, shimoliy qutbdagi orol-shaharda davom etadi. Bosh qahramon bo‘lgan pochtachi o‘z maktublarini eltib berish davomida o‘yinchoq yasovchi odam bilan tanishib qoladi va birgalikda bolalarga o‘yinchoq ulashishni boshlaydi. Bir yil ichidayoq multfilm yuksak muvaffaqiyatlarga erishishga ulgurib, muxlislarning eng sara animatsiyalaridan biriga aylandi.
Filmdan lavha
6. “Mo‘jizaviy hayot” filmi
1946-yil Frenk Kapra tomonidan “Eng buyuk sovg‘a” hikoyasi asosida suratga olingan “Mo‘jizaviy hayot” filmi Yangi yil arafasida bosh qahramonning oiladagi muammolari va moliyaviy ahvoli yomonligi bilan yuzaga keluvchi taqdir sinovlari bilan davom etadi. Film bosh qahramon Jorj Beyli (Jeyms Styuart)ning boshqalarga yordam berish uchun o‘z orzularidan kechishi va hayotidagi ulkan qiyinchiliklarga duch kelishidan boshlanadi. Jorj har qanday vaziyatda o‘z yaqinlarini qo‘llab-quvvatlab, shaxsiy hayotiga deyarli e’tibor bermaydi. Film davomida esa uning hayotida mo‘jiza yuz beradi.
Filmdan lavha
Yangi yilga yaqin o‘zgacha oilaviy zavq bera oladigan ushbu film inson hayotida oila ahamiyatini qanchalik muhim ekanini doimo ko‘rsatib turadi.
5. “Omadli jentlmenlar”
Aleksandr Seriy tomonidan 1971-yil suratga olingan “Omadli jentlmenlar” filmi barchamizga qadrdon kinokomediya bo‘lishga ulgurdi. Filmda Yevgeniy Leonov ikki bosh qahramon rolini ijro etgan bo‘lib, voqealar bog‘cha tarbiyachisining jinoiy guruhga bosh bo‘lishi va ular bilan o‘g‘irlangan arxeologik topilmalarni qidirish bilan davom etadi.
Filmdan lavha
Yangi yil arafasida oila va do‘stlar davrasida tomosha qilish uchun eng sara film hisoblangan “Omadli jentlmenlar” deyarli barcha tomoshabinlarning ko‘nglidan joy olishni kafolatlaydi.
4. “Shimoliy ekspress” animatsion filmi
2004-yil Robert Zemikis tomonidan yaratilgan “Shimoliy ekspress” animatsiyasi Yangi yil uchun ishlangan barcha davrlarning eng zo‘r multfilmi hisoblanadi. Unga ishlangan soundtrek esa Yangi yil kayfiyatini bera oladigan eng yaxshi musiqa deb topildi. Animatsiyadagi voqealar qorbobo borligiga ishonmaslikni boshlagan bolaning mo‘jizaviy poyezdda shimoliy qutbga borishini tasvirlaydi. Bosh qahramon ushbu sayohati davomida haqiqiy do‘stlar orttirib, hayotidagi eng ajabtovur kunni o‘tkazadi.
Foto: Google Photos
Ushbu multfilm esa bolalar uchun sarguzashtlarga boy ertaknamo olamni ajoyib ko‘rsatib beradi.
3. “Taqdir hazili yoki qushday yengil bo‘ling” filmi
Eldar Ryazanovning 1975-yil suratga olingan “Taqdir hazili” melodramasi bayram kuni tomosha qilish uchun eng sara sovet filmi hisoblanadi. Shuning uchun ham har Yangi yil oldidan ushbu film turli telekanallarda qo‘yilishi an’anaga aylanib ulgurdi.
Filmda mast holatda bo‘lgan bosh qahramon manzilda adashib, boshqa shaharga yo‘l oladi. Moskva va Leningrad shaharlari bir xil manzillarga ega bo‘lgani uchun bosh qahramon adashganini sezmaydi, voqealar davomida esa yana taqdir hazili bilan sevgi aloqalarini o‘rnatishni boshlaydi.
Filmdan lavha
Taqdir hazillariga boy bo‘lgan ushbu film hayotdagi turli tasodiflar sababli hayotimiz mutlaqo o‘zgarib ketishi mumkin ekanini ko‘rsatib turadi.
2. “Elf” filmi
2003-yil Jon Favro tomonidan ishlangan “Elf” filmi bosh qahramonning hali aqlan ulg‘aymagan bo‘lsa-da, soddadillik, ochiqko‘ngillik, beg‘uborlik bilan odamlarga yaxshilik qilishga intilishini ko‘rsatadi. Filmda Elf (Vill Ferrel) yoshligida qorboboning qopiga tushib oladi va shimoliy qutbda ulg‘ayadi. Vaqt o‘tishi bilan u o‘z oilasini qidirgani Nyu-York shahriga tashrif buyuradi. Voqealar esa oilaning qayta birlashuvi bilan davom etadi.
Filmdan lavha
Sof tuyg‘ular va beg‘uborlik bilan ishlangan ushbu klassik komediya o‘zi bilan “Ushbu bayramda o‘z elfingni kashf qil”, deya tomoshabinlarga o‘z maqsadlariga intilish uchun iliq xabarlar ulashadi.
1. “Uyda yolg‘iz” film seriallari
“Uyda yolg‘iz” filmlari Jon Xyuz tomonidan suratga olingan bo‘lib, shubhasiz, Yangi yil shukuhini ko‘rsatib turuvchi eng zo‘r klassika hisoblanadi. Filmlar 1990–1997-yillar davomida ishlangan bo‘lib, uning ilk ikki qismi dunyo bo‘ylab ulkan mashhurliklarga erishdi. Ushbu filmlarda bosh qahramon Kevin Makkalister (Makoley Kalkin) oilasidan yolg‘iz holda ikki o‘g‘riga qarshi turli tuzoqlar bilan qarshilik qiladi. Kevin yosh bo‘lsa-da, kattalardan qolishmagan holda fikrlay olishi filmni qayta ko‘rganda ham qiziqarli davom etishini ta’minlab turadi.
Filmdan lavha
“Uyda yolg‘iz” filmlarining birinchi va ikkinchi qismi har Yangi yil arafasida eng ko‘p qayta ko‘riladigan filmlar hisoblanadi.
Qo‘shimcha tariqasida, bayram uchun eng yaxshi filmlar qatoriga “Ta’tillar almashganda” (2006), “Grinch” (2000), “Yangi yil sovg‘asi” (1996), “Ishdagi ishq” (1977), “Haqiqiy sevgi” (2003), “Charli va shokolad fabrikasi” (2005) kabi sara kinolarni ham misol keltirish mumkin.
Farrux Ahmadjonov tayyorladi.
