Ayova, Arizona, Kanzas va yana beshta shtat OpenAI’ni iste’molchilarni aldashda aybladi. Ularning so‘zlariga ko‘ra, ChatGPT bolalarga zarar yetkazadi, kompaniya esa xavfsizlikdan ko‘ra foydani ustun qo‘ygan.
Manba: «Mail.ru Hi-Tech».
Hi-Tech Mail muharriri
Sakkizta Amerika shtati OpenAI’ga qarshi da’vo arizasi berdi. Ular kompaniyani ChatGPT xavfsizligi borasida odamlarni chalg’itganlikda va bolalarni xavf ostiga qo‘yganlikda ayblamoqda. Da’volar haqida birinchi bo‘lib Reuters agentligi xabar berdi, shikoyatlar tafsilotlari va OpenAI javobini esa The Verge keltirmoqda.
Da’volar Ayova, Kanzas, Nebraska, G‘arbiy Virdjiniya, Arkanzas, Arizona, Aydaxo va Montanada alohida-alohida topshirilgan. Hokimiyat talqiniga ko‘ra, ChatGPT’ni ishlab chiqishda kompaniya xavfsizlikdan ko‘ra foydani ustun qo‘ygan. Bundan tashqari, u chat-botning xavf-xatarlari haqida foydalanuvchilarni ogohlantirmagani uchun iste’molchilar huquqlarini himoya qilish bo‘yicha mahalliy qonunlarni buzgan. Shtatlar ChatGPT o‘z yaqinlarining halok bo‘lishida rol o‘ynagan deb hisoblaydigan o‘smirlar va kattalarning qarindoshlari topshirgan da’volarga tayanmoqda.
Shikoyatlarda aytilishicha, OpenAI ChatGPT’ni «xavfsiz, yoshlar uchun mos va xavfsizlikni birinchi o‘ringa qo‘yadigan vosita» sifatida taqdim etgan. Amalda esa chat-bot, da’vogarlarning so‘zlariga ko‘ra, «zaif foydalanuvchilar uchun xavfli» bo‘lib chiqqan. U «tanqidiy fikrlash ko‘nikmalarini susaytiradi, paranoi va vasvasani rag’batlantiradi, xavfli tibbiy maslahatlar beradi va nosog’lom xulq-atvor hamda munosabatlarga undaydi».
Shtatlar, shuningdek, kompaniyani voyaga yetmaganlarning ma’lumotlarini yig’ishda ayblamoqda. Ularning fikricha, OpenAI bolalar chat-botdan foydalanmasligi uchun juda oz ish qilmoqda. Kompaniyaning «mas’uliyatsizligi» isboti sifatida da’volarda nazoratdan chiqqan SHT tomonidan amalga oshirilgan yaqindagi xakerlik hodisalari ham tilga olingan. Arizonaning da’vosida aytilishicha, OpenAI jamiyat uchun ishlagan va xavfsizlikni birinchi o‘ringa qo‘ygan nodavlat tashkilotdan «SHT kabi kuchli vositani ishlab chiqishda xavfsizlik emas, balki har qanday evaziga foyda olishga intilish yetakchilik qilsa va zarur himoya choralari ikkinchi darajaga tushib qolsa nima bo‘lishi haqida saboq bo‘luvchi voqea»ga aylangan.
Shtatlar sudlardan OpenAI’ga fuqarolik jarimalarini to‘lash va odamlarni ChatGPT xavfsizligi borasida chalg’itishni to‘xtatish majburiyatini yuklashni so‘ramoqda. Ularning ba’zilari noqonuniy yig’ilgan shaxsiy ma’lumotlarni o‘chirishni ham talab qilmoqda.
OpenAI vakili Dryu Pusateri The Verge’ga bergan izohida ChatGPT’da «yosh xususiyatlarini hisobga olgan holda sohadagi eng yaxshi himoya mexanizmlari» o‘rnatilganini ta’kidladi. «Hech bir tizim mukammal bo‘la olmaydi, lekin biz ekspertlar bilan ishlashni va ota-onalar nazorati, tanaffus haqidagi eslatmalar hamda modelning yosh cheklovlari kabi mavjud bo‘lgan qo‘shimcha himoya choralarini yaratishni davom ettiramiz. Biz shtatlar bilan birgalikda birgina kompaniyaga emas, balki butun sohaga tegishli bo‘ladigan SHT sohasidagi pragmatik siyosat ustida ishlashga tayyormiz», — deya qo‘shimcha qildi u.
OpenAI’ga qarshi bunday da’voni ilgari boshqa bir shtat hokimiyati ham topshirgan edi. Iyun oyida Florida bosh prokurori Djeyms Atmayyer kompaniya va uning bosh direktori Sem Altman ustidan sudga murojaat qilgan. U OpenAI’ni ChatGPT’ni, jumladan, bolalar orasida ham targ’ib qilganlikda va shu bilan birga jiddiy xavf-xatarlarni yashirganlikda ayblagan edi.
Avvalroq biz OpenAI SHT-agentlari Vikipediyaga so‘roqsiz tahrir kiritgani hamda olim neyrotarmog’ining maktablardagi asosiy xavfini nimada ko‘rayotgani haqida so‘zlab bergan edik.
