IIxtiyoriy nuqtaga axborotni zumda uzatuvchi va Butun koinotni qamrab oluvchi koʻrinmas energiya iplari mavjudligi haqidagi gʻoya ilmiy-fantastik roman uchun mukammal syujetdek tuyuladi.
Manba: «Factodrom.com»
Ushbu nazariyaga koʻra, har qanday aylanish (aylanayotgan pildiroqdan tortib — olisdagi galaktikagacha) modda tuzilishini oʻzgartirishga va hatto inson shuuriga taʼsir etishga qodir boʻlgan alohida maydonni hosil qiladi. Lekin ular haqiqatan ham mavjudmi?
Oʻn yillar davomida torsion maydonlar taʼlimoti izdoshlari abadiy dvigatellar erasini vaʼda qilishdi, biroq reallikda goʻzal atamalar ortida zamonaviy fan tarixidagi eng shov-shuvli va qimmatga tushgan uydirmalardan biri yashirinib yotibdi.
«Torsion» tushunchasining oʻzi (lotincha torsio — burish, burash) jiddiy fizikadan kirib kelgan. Olimlar fazo-vaqt faqat sayyoralar ogʻirligi ostida egilibgina qolmay, balki ularning aylanishi taʼsirida «buralishi» ham mumkinligini haqiqatan ham taxmin qilishgan. Ammo rasmiy tenglamalarda bu effektlar shunchalik kichikki, ularni oʻlchash deyarli imkonsiz boʻlsa, «muqobil» fanda torsion maydonlar toʻsatdan aql bovar qilmas kuchga ega boʻldi. Nazariya tarafdorlari bu masofadan qatʼi nazar susaymaydigan va har qanday gʻovlarni goʻyo ular yoʻqdek yorib oʻtadigan tabiatning «beshinchi kuchi» deb taʼkidlashdi.
80- va 90-yillarda ushbu mavzu atrofida haqiqiy detektiv voqealar rivojlandi. «Torsion generatorlar» yordamida poʻlat xossalarini oʻzgartirish, bir moddani boshqasiga aylantirish va hatto qoyalar qatlami orqali radiosignallar uzatish mumkinligi haqida maxfiy laboratoriyalardan bayonotlar paydo boʻldi. Biroq, akademik hamjamiyat dalillarni talab qilganda, ushbu qogʻoz uycha qulab tushdi. Birorta ham mustaqil tekshiruv ushbu moʻjizaviy qurilmalarning ishini qayd eta olmadi. Sensatsiyalar ortida tajribasiz tadqiqotchilarning xatolari yoki davlat grantlarini olish ilinjida atamalarni qasddan manipulyatsiya qilish yotgani maʼlum boʻldi.
Bugungi kunda fiziklar bir ovozdan taʼkidlashadi: ezoteriklar va «muqobilchilar» tasvirlagan koʻrinishdagi torsion maydonlar mavjud emas. Ularga tulajadigan barcha effektlar elektromagnetizm yoki gravitatsiyaning allaqachon maʼlum boʻlgan qonunlari bilan muvaffaqiyatli tushuntiriladi. Shunga qaramay, «moʻjizaviy aylanish» haqidagi afsona shifobaxsh bilaguzuklar, radiatsiyaga qarshi yelimqogʻozlar va «suvni strukturallashtirish» qurilmalari reklamasida yashashda davom etmoqda. Bu real ilmiy atama qanday qilib oʻgʻirlanishi hamda bizning nomaʼlumlikka boʻlgan intilishimizdan foydalanadigan antiilmiy gʻoyalar uchun yorqin oʻramga aylanishining yorqin misolidir.
