2027 yilda Ilon Mask AQShdagi har bir bolaga o‘zining SpaceX kompaniyasidagi bittadan aksiyasini sovg‘a qiladi. Qimmatli qog‘ozlarning joriy narxi bo‘yicha bu taxminan 10,5 mlrd dollarni tashkil etadi, biroq aksiyalar qanday tarqatilishi haqida tadbirkor tushuntirish bermadi.
Manba: «Mail.ru Hi-Tech».
SpaceX rahbari Ilon Mask dushanba kuni, 19 oktyabrda o‘zining X ijtimoiy tarmog‘ida kelasi yili AQShdagi har bir bolaga kompaniyaning bittadan aksiyasini sovg‘a qilishni va’da qildi. «Bu shunday qadamlarning ko‘plab birinchisi bo‘ladi», — deya qo‘shimcha qildi tadbirkor. Postda tafsilotlar yo‘q: Mask qimmatli qog‘ozlar qanday taqsimlanishi, ularni aynan kimlar olishi va bu qachon sodir bo‘lishiga aniqlik kiritmadi.
Va’daning ko‘lamini CNBC hisoblab chiqdi. Aholi ro‘yxatga olinishi ma’lumotlariga ko‘ra, 2025 yil 1 iyul holatiga ko‘ra AQShda 18 yoshdan kichik bo‘lgan 72 mln kishi yashagan. Juma kuni, 16 oktyabrda savdolar SpaceX aksiyasi narxi 146,03 dollar bo‘lganda yopildi. Demak, Mask taxminan 10,5 mlrd dollarlik qimmatli qog‘ozlardan voz kechishiga to‘g‘ri keladi.
Tadbirkorning o‘zi uchun bu ulushning kichik bir qismidir. AQSh Qimmatli qog‘ozlar va birjalar komissiyasi uchun avgust oyidagi hisobotga ko‘ra, Maskka SpaceX’ning taxminan 4,8 mlrd aksiyasi tegishli. Hali unga o‘tmagan mukofotlar va opsionlar bilan birga 6,4 mlrd qimmatli qog‘oz yoki kompaniyaning 48,4% qismi hosil bo‘ladi. Bolalarga tarqatish u bevosita egalik qiladigan aksiyalarning taxminan 1,5% qismini tashkil qiladi.
SpaceX’da shunga o‘xshash sovg‘a allaqachon bo‘lgan edi. Iyul oyida kompaniya prezidenti Gvinn Shotvell Trump Accounts dasturi orqali taxminan 2 mln bolaga bittadan aksiya topshirishni va’da qilgandi. Bu 4 iyulda ishga tushirilgan soliq imtiyozlariga ega bolalar investisiya hisobvaraqlaridir. 2025 yildan 2028 yilgacha tug‘ilgan chaqaloqlar uchun davlat bir marta ularga 1000 dollar o‘tkazadi. Shotvell daromadi o‘rtachadan past bo‘lgan oilalardagi 11 yoshdan 17 yoshgacha bo‘lgan o‘smirlarni tanlagan edi, o‘z sovg‘asini esa u SpaceX’ning birjaga rekord darajada chiqqanidan bir necha hafta o‘tib qilgandi. O‘shanda AQSh prezidenti Donald Tramp Maskdan ham shunday qadam kutayotganini aytgandi. Hozir Mask nafaqat kam ta’minlangan, balki mamlakatdagi barcha bolalar haqida gapirmoqda. U aksiyalarni o‘sha dastur orqali tarqatadimi-yo‘qmi, hozircha noma’lum.
Avvalroq biz Mask Tesla va SpaceX chiplar fabrikasini o‘zlari boshqarishini xohlayotgani haqida so‘zlab bergan edik.
