Xitoyning Xubey viloyatidan tarqalgan yangi koronavirus qurbonlari soni 80 kishiga yetdi. Bu haqda Xitoy Sog‘liqni saqlash vazirligiga asoslanib, South China Morning Post xabar bermoqda. Virusni yuqtirganlar soni esa 2400 kishidan oshib ketgan — deb bu haqda «Daryo» nashri xabar beradi.
Foto: Reuters
Nashr kasallanish holatlari bo‘yicha hisob-kitoblarni e’lon qilgan. Unga ko‘ra,
- Xitoyda — 2454 ta holat;
- Gonkongda — 8 ta holat;
- Makaoda — 5 ta holat;
- Tayvanda — 3 ta holat;
- Osiyoning boshqa mamlakatlarida — 24 ta holat;
- Yevropada — 3 ta holat;
- AQShda — 5 ta holat;
- Avstraliyada — 4 ta holat.
Xitoyning Uxan shahri koronavirus o‘chog‘i hisoblanadi, bu va yana bir necha shahar karantinga yopilgan. Avvalroq Xitoy rahbari Si Szinpin koronavirus bilan bog‘liq vaziyatni “murakkab” deb atab, kasallikning tarqalish sur’ati oshganini tan olgan edi.
O‘zbekistonda hozircha koronavirus bilan kasallanish holatlari rasman qayd etilgani yo‘q. Mamlakat aeroportlarida kasallikka qarshi xavfsizlik choralari ko‘rilgan, xususan, kuni kecha Xitoydan qaytarib olib kelingan o‘zbekistonlik talabalar aeroportning o‘zidayoq jiddiy tekshiruvdan o‘tkazilgani haqida xabar berilgan edi.
