1-iyuldan xalq ta’limi tizimidagi ayrim fanlar chuqur o‘rganiladigan ixtisoslashtirilgan davlat umumta’lim maktablari (5-sinf) va maktab-internatlari (7-sinf)ga 2020/2021-o‘quv yili uchun o‘quvchilar qabuli jarayoni boshlandi. Bu haqda Xalq ta’limi vazirligi axborot xizmati xabar qilgan — deb bu haqda «Daryo» nashri xabar beradi.
Foto: Xalq ta’limi vazirligi axborot xizmati
Xabarga ko‘ra ixtisoslashtirilgan umumta’lim muassasasining 5-sinfi uchun hujjatlar 2020-yilning 1—31-iyul kunlari hamda 7-sinf uchun hujjatlar 1—20-iyul kunlari qabul qilinadi.
Ixtisoslashtirilgan umumta’lim muassasalariga iqtidorli o‘quvchilar Davlat test markazi tomonidan tegishli fanlar bo‘yicha o‘tkaziladigan test sinovlari (saralash tanlovi) natijalari asosida qabul qilinadi.
Pandemiya sharoitini inobatga olib, ixtisoslashtirilgan umumta’lim muassasalarida hujjatlarni onlayn qabul qilish uchun sharoitlar yaratilmoqda.
Ixtisoslashtirilgan ta’lim muassasalariga o‘quvchilar qabuli bo‘yicha tanlovlar avgust oyida oliy ta’lim muassasalariga qabul test sinovlari yakunlanganidan so‘ng o‘tkazilishi rejalashtirilgan.
O‘zbekistondagi karantin cheklovlari sababli saralash tanlovlarini o‘tkazish muddati o‘zgarishi mumkin.
