Yangi yil dasturxonidan an’anaviy tarzda olivye salati joy oladi. Albatta, ushbu salat barchaga birdek manzur keladi, ammo uning o‘rnini bosuvchi yana bir qancha mazali salatlar retseptini e’tiboringizga havola etamiz.
— Manba: «Daryo» nashri.
Foto: Marie Claire
Baliq va qovoqli salat retsepti
Foto: Marie Claire
Ajoyib ko‘rinishga ega bo‘lgan ushbu salat ta’m borasida ham boshqalardan qolishmaydi.
Kerakli mahsulotlar:
- pishirilgan qovoq – 60 gramm;
- xurmo – 40 gramm;
- apelsin – 50 gramm;
- rukkola – 40 gramm;
- pishirilgan qizil baliq – 50 gramm;
- limon, soya sousi, sarimsoq, zaytun moyi, zanjabil.
Tayyorlanish jarayoni:
- Apelsin va xurmo bo‘laklarga bo‘linib, rukkola bilan aralashtiriladi.
- Qovoq katta bo‘laklarga bo‘linib, ziravorlar bilan pechda 160-170 darajada 20 daqiqa davomida pishirib olinadi.
- Apelsin va xurmo aralashmasiga baliq qo‘shiladi.
- Ustidan zanjabil, sarimsoq, soya sousi va zaytun moyi qo‘shiladi va yaxshilab aralashtiriladi.
- Aralashma qovoqning ustiga solinadi va dasturxonga tortiladi.
Ko‘katli salat retsepti
Foto: Marie Claire
Vitaminlarga boy bo‘lgan ushbu salat diyetadagilar uchun ayni muddao.
Kerakli mahsulotlar:
- turli xil ko‘kat barglari;
- avokado – 60 garmm;
- brokkoli – 60 gramm;
- bodring – 50 gramm;
- yashil olma – 40 gramm;
- zanjabil sousi – 40 gramm;
- urug‘lar aralashmasi.
Tayyorlanish jarayoni:
- Salat barglari yuviladi va quritiladi.
- Brokkoli 1 daqiqa davomida qaynatiladi va sovuq suvda chayib, to‘g‘raladi.
- Bodring va olma yirik shaklda to‘g‘raladi.
- So‘ngra hamma mahsulot aralashtiriladi, sous va ziravorlar qo‘shiladi.
Yoqimli ishtaha!
Shuba ostida seld balig‘i retsepti
Foto: Marie Claire
Ushbu salatda ikki xil baliq ta’mini ta’tib ko‘rish mumkin.
Kerakli mahsulotlar:
- qaynatilgan lavlagi – 40 gramm;
- qaynatilgan kartoshka – 40 gramm;
- qaynatilgan sabzi – 30 gramm;
- seld balig‘i – 40 gramm;
- muzlatilgan muskun filesi – 25 gramm;
- tuxum – 1 dona;
- mayonez – 50 gramm;
- xushbo‘y moy – 5 gramm;
- tuz va ziravorlar.
Tayyorlanish jarayoni:
- Barcha qaynatilgan mahsulotlar qirg‘ichdan o‘tkaziladi.
- File yupqa parrak shaklida, seld esa to‘rtburchak qilib to‘g‘raladi.
- Masalliqlar dumaloq shaklda kartoshka, seld, sabzi, tuxum va lavlagi ketma-ketligida ustma-ust qo‘yiladi.
- Ustiga muskun filesining yupqa bo‘laklari joylashtiriladi. Ta’bga ko‘ra tuz va ziravorlar sepilib, xushbo‘y yog‘ quyiladi.
Yoqimli ishtaha!
Nok va strachatella pishlog‘i qo‘shib tayyorlanadigan salat retsepti
Foto: Marie Claire
Nok va pishloqning uyg‘unlikdagi yangi ta’midan bahramand bo‘ling.
Kerakli mahsulotlar:
- ko‘kat barglari aralashmasi – 30 gramm;
- nok – 30 gramm;
- mol go‘shti – 15 gramm;
- strachatella – 60 gramm;
- balzam sirkasi – 0,5 choy qoshiq;
- zaytun moyi – 1 osh qoshiq;
- qovoq urug‘i – 7 gramm;
- kunjut – 3 gramm.
Tayyorlanish jarayoni:
- Ko‘kat barglari aralashmasi idishga aylana solinadi.
- Nok uzunchoq parrak shaklida to‘g‘raladi va ko‘katlar bilan aralashtiriladi.
- Aralashmaga pishirilgan mol go‘shti to‘g‘rab qo‘shiladi va idish o‘rtasida joy qoldiriladi.
- Strachatellaga biroz nok qo‘shilib, idishning o‘rta qismiga quyiladi.
- Salat ustidan balzam sirkasi va kunjut sepiladi.
Yoqimli ishtaha!
Dangasa baliq salati
Foto: Marie Claire
Navbatdagi ushbu mazali salat ham bayram dasturxoni uchun ayni muddao.
Kerakli mahsulotlar:
- tunets balig‘i – 300 gramm;
- pomidor – 2 dona;
- makkajo‘xori – 3 osh qoshiq;
- bulg‘or qalampiri – 1 dona;
- tuzlangan bodring – 2 dona;
- limon – 1 dona;
- ko‘kat va zaytun moyi.
Tayyorlanish jarayoni:
- Tuzlangan bodring, bulg‘or qalampiri, baliq va ko‘k piyoz mayda to‘g‘raladi.
- Pomidor po‘sti olinib, to‘rtburchak shaklda to‘g‘rladi.
- Barcha mahsulot idishga solinadi, makkajo‘xori, zaytun moyi, limon sharbati, tuz va ziravorlar sepiladi.
- Salat ko‘katlar bilan bezatiladi.
Yoqimli ishtaha!
