Ko‘krak suti bezi saratoni haqidagi savollarga javoblar

Afsuski, jahonda ko‘krak suti bezi saratoni ayollarni o‘limga olib keluvchi xavfli kasallik bo‘lib qolmoqda. Har yili dunyo bo‘yicha ushbu tashxis qo‘yilgan yuz minglab ayol vafot etmoqda. Bu kasallik bilan kurashishning eng samarali yo‘li erta bosqichlarda aniqlash va davolashdir. Erta bosqichida ko‘krak suti bezi saratoni tashxisi qo‘yilgan bemorlarning 10 tadan 9 tasi tashxis qo‘yilganidan keyin yashab ketadi. Oxirgi bosqichlarda aniqlanganda esa, 3 nafar bemordan 1 nafari tirik qoladi.

 — Manba: «Daryo» nashri.

Onkomammolog-jarroh Umid Najmutdinov “Daryo” nashriga ko‘krak suti bezi saratoni yuzasidan eng ko‘p beriladigan savollarga javob berdi.

Ko‘krak suti bezlarini qachondan tekshirish kerak?
— 20 yoshdan boshlab har oy o‘z-o‘zini tekshirish lozim va yilda bir marotaba shifokor ko‘rigi tavsiya etiladi.

O‘z-o‘zini tekshirish qanday?
— Har oyning bir xil kunida, dush qabul qilganda yoki yotgan holda yumshoq harakatlar bilan amalga oshiriladi.

Qachon mammografiya tekshiruvidan o‘tib turish kerak?
— 40 yoshdan boshlab har 1–2 yilda bir marta.

Ko‘krak suti bezi saratoniga olib keluvchi xavf omillari.
— Irsiy omillar, noto‘g‘ri ovqatlanish, gormonal buzilishlar va stress.

Sut bezida qattiqlik bo‘lishi xavflimi?
— Har qanday tugun tekshiruv uchun sabab. Xavfli yoki xavfsizligini faqat shifokor aniqlaydi.

Bir tomonlama og‘riq?
— Gormonal o‘zgarishlar yoki yallig‘lanish bo‘lishi mumkin. Lekin doimiy bo‘lsa, tekshirish zarur.

Ko‘krak uchidan suyuqlik oqishi nimadan dalolat beradi?
— Aksariyat hollarda xavfsiz bo‘lishi mumkin. Lekin qon yoki sarg‘ish suyuqlik xavotirli belgi hisoblanadi.

Teridagi o‘zgarishlar?
— Qizarish, chuqurcha yoki toshmalar ko‘krak sirtidagi kasalliklardan belgi bo‘lishi mumkin.

Ultratovush tekshiruv (UTT) orqali nimalarni bilish mumkin?
— Kistami, o‘simtami, tuzilma o‘zgarishimi — aniqlab beradi.

Tekshiruv og‘riqlimi?
— UTT umuman og‘riqsiz o‘tadi.

O‘simta topilsa, nima bo‘ladi?
— Biopsiya olinadi. Shunga qarab davo rejasi tuziladi: jarrohlik, radiatsiya, kimyo yoki gormon terapiyasi.

Operatsiyasiz davolash mumkinmi?
— Baʼzi holatlarda, ha. Ammo bu tashxisga bog‘liq.