Chempionlar odati: salomatlik va ichki xotirjamlik uchun professional sportchilardan tavsiyalar

Professional sportchilar tana va ong salomatligini muvozanatda saqlashni yaxshi biladi. Bunga erishish uchun ular og‘ir mashg‘ulotlar, qat’iy rejimlar bilan cheklanib qolmaydi va oddiy kundalik odatlarga amal qiladi.

 — Manba: «Daryo» nashri.

Bunday odatlar ularga stressni kamaytirishga, o‘ziga ishonchni mustahkamlashga va ichki xotirjamlikni saqlashga yordam beradi. Eng asosiysi — bu odatlar hammaga birdek mos keladi. Quyida ulardan eng foydali va hayotingizga oson tatbiq etiladigan beshtasini tanlab oldik.

1. Maykl Felps — ertalabki suzish

Maykl Felps professional suzuvchi, u 14 yoshidan boshlab har kuni tongda basseynda suzishni odat qilgan. “Ertalabki salqin suv bu zarurat, u tana va ongni uyg‘otadi”, deydi Felps intervyularidan birida.

Hatto 15 daqiqalik suzish ham energiya beradi, shishlarni kamaytiradi hamda mushaklarni taranglashtiradi. Basseynga borish imkoni bo‘lmasa ham, kontrast dush bilan shunga yaqin natijaga erishish mumkin.

2. Serena Uilyams — maqsad va his-tuyg‘ularni yozib borish

Serena Uilyams ko‘p yillardan beri kundalik tutishni odat qilgan. Bu sportchi uchun nafaqat rejalar yozish vositasi, balki stressga qarshi kurash usuli hamdir. Uning so‘zlariga ko‘ra, maqsadlar va his-tuyg‘ularni qog‘ozga tushirib borish motivatsiyani yo‘qotmaslikka yordam beradi.

Kundalik yuritishning boshqa afzalliklari ham ko‘p. Unda muhim reja va g‘oyalarni yozib borish, xotiralarni saqlash, ijodiy fikrlarni qayd etish mumkin. Shuningdek, u asabiylikni kamaytirishga yordam beradigan “cho‘ntak psixolog” hamdir.

3. Novak Jokovich — nafas olish mashqlari va meditatsiya

Novak Jokovich serbiyalik professional tennischi, zamonaviy tennis tarixidagi eng muvaffaqiyatli sportchilardan biri hisoblanadi. U turnirlarida 24 ta chempionlikni qo‘lga kiritgan va bu ko‘rsatkich rekord hisoblanadi.

Jokovich nafaqat jismoniy tayyorgarligi, balki aql-zakovati va intizomi bilan ham ajralib turadi. Uning fikricha, meditatsiya xavotir, g‘azab, tortinchoqlik bilan kurashishda yordam beradi. Nafas mashqlari esa ichki ishonch hamda yengillikni his qilishga yordam beradi. Shu sababli bu odatlar uning ertalabki kun tartibiga kiritilgan.

4. Usayn Bolt — kunni xavotirsiz va tashvishlarsiz boshlash

Olimpiya o‘yinlari tarixidagi eng tez yuguruvchi sifatida tanilgan Usayn Bolt sportdagi faoliyatini yakunlagan bo‘lsa-da, jamoatchilik e’tiboridan chetda emas. U tongni osoyishtalik bilan boshlashga odatlangan. U har kuni bir vaqtda uyg‘onadi, dush qabul qiladi, yengil mashqlar bilan shug‘ullanadi va sekinlik bilan nonushta qiladi. Asosiy shart — ertalablari shoshmaslik hamda o‘ziga qulay muhit yaratish.

5. Simona Baylz — tongda xotirjam nonushta qilish

Sport tarixining eng muvaffaqiyatli gimnastikachilaridan biri. AQSH terma jamoasi a’zosi bo‘lgan Simona Baylz Olimpiya va jahon chempionatlarida 30 dan ortiq medalga ega, shularning aksariyati oltin.

U nonushtaga jiddiy yondashadi: bu vaqtda gadjetlarga chalg‘imaydi, suhbat yoki shoshilinch rejalar haqida o‘ylamaydi. Aksincha, sokin va tinch muhitda, faqat o‘zi bilan yolg‘iz qolib, nonushta qilishni afzal ko‘radi. Baylz ta’kidlashicha, ana shu daqiqalar unga ichki holatini tinglash, fikrlarini tartibga solish va kunni omadli boshlash imkonini beradi.