«ҚУДА — АНДА» ЛУҒАТИ

АММА:

Жиянларга парвона,

Она ўрнида она.

Лек жахли чиқса яна,

Ундан яхши бегона!

***

ЁН ҚЎШНИ:

Келган совчини албатт
Айнитар қилиб ғийбат!

***

ҚАЙИНСИНГИЛ:

Сўзи кескир ханжардай,

Қарашлари захардай.

Нарсаларни акт қилар,

Келинни инфаркт қилар!

***

БАЙРАМЛАР

Қудалар харажатда,

Пойга қилиб ўзаро.

Орқасидан албатта,

Бир кун бўлар можаро!

***

ХОЛА:

Мехрибон жиянларга,

Гиргиттон мехмонларга.

***

ТОҒА:

Тўйларда тўкиб савлат,

Тўрдан жой олар албатт!

***

БУВИ:

Мехнат қилиб толмаган,

Битта хам тиш қолмаган.

Насихатда эрта-кеч,

Дуодан чарчамас хеч!

***

КУЁВ:

Гарчи ўғилдир куёв,

Лекин барибир у “ёв”!

***

КЕЛИН:

Одобли нихоятда,

Бир йиллик кафолатда!

***

ҚАЙНОНА:

Жиддий тутиб ўзини,

Ўйлаб айтар сўзини.

Шундай ўтар хар куни,

Генерал дейсиз уни!

***

ҚАЙНОТА:

Мўйловлари шоп каби,

Қорни чиққан қоп каби.

Гапирсанг чиқасадан,

Оғиб қолар эсидан!

***

ҚАЙИНИ:

Хизмат қилар барчага,

Елкадошдир поччага.

“Кўпайиб” кетса бироқ,

Уйга жўнатинг тезроқ!

***

ДАСТУРХОНЧИ:

Дастурхонни тузатиб,

Мехмонларни кузатиб,

Жўнатади мехмонни,

Еб улгурмай таомни!

***

КУЁВ НАВКАРИ:

Йигитлар ўт юракли,

Куёвга хўп керакли.

Бўлишар жонли тўсиқ,

Ўйнашар бўлса қўшиқ!

***

КЕЛИННИНГ ДУГОНАСИ:

Келинга яқин сирдош,

Маслахатдош, маслакдош.

Сир сақлашни билади,

Баъзан “гуллаб” қўяди.

***