2021-yilda Keyt Middlton va shahzoda Uilyamning turmush qurganiga 10 yil to‘ldi. Bu vaqt mobaynida ular dunyoning eng mashhur juftligiga aylanishdi, lekin jamoatchilik qizining shu darajaga yetishiga sababchi bo‘lgan Keytning onasi — Kerol Middlton haqida ko‘p narsa bilmaydi. Buyuk erkaklarning orqasida buyuk ayollar turadi, degan gap ham bejizga aytilmagan. Buni nafaqat erkaklar, balki ayollar haqida ham aytish mumkin, chunki ko‘pchilik qizlar onasining maslahati va tarbiyasi tufayli hayotda muvaffaqiyat qozonadi.
— Manba: «Daryo» nashri.
Konchining nevarasi
Foto: AFP
Kerol Goldsmit 1955-yilda Londonda tug‘ilgan. Otasi quruvchi, onasi tushgacha zargarlik do‘konida, tushdan keyin fabrikada ishlardi. Kerolning ota-bobosi konchi bo‘lgan, shuning uchun ham ularning oilasi o‘ziga to‘q emas edi: Kerolning so‘zlariga ko‘ra, ota-onasi kun kechirish va bolalarga yaxshi sharoit yaratish uchun qattiq mehnat qilgan.
Qiz 16 yoshida maktabni tashlaydi, lekin tez orada o‘qishini yana davom ettiradi. U o‘qituvchi bo‘lishni orzu qilardi, lekin ota-onasining qizini kollejda o‘qitishga qurbi yetmasdi, shuning uchun Kerol kotiba bo‘lib ishlay boshladi. Keyinchalik u British Airways kompaniyasiga ishga o‘tdi va styuardessa bo‘ldi. Bu yerda u aristokratlar oilasidan bo‘lgan dispetcher Maykl Middlton bilan tanishib qoldi. 1980-yilda sevishganlar turmush qurishdi va kichkina uy sotib olishdi. 2 yil o‘tgach, ularning to‘ng‘ich qizi Keyt, keyinchalik esa yana bir qizi Filippa va o‘g‘li Jeyms tug‘ildi. Bu orada ular Iordaniyada ham 2 yil yashadi — Maykl Middlton u yerga ish yuzasidan yuboriladi, keyinchalik yana Angliyaga qaytib kelishadi.
Tadbirkor ayol
Kerol Middlton turmush o‘rtog‘i Maykl bilan
Foto: AFP
Iordaniyadan qaytganidan ko‘p o‘tmay, Kerol oilaning moddiy ahvolini yaxshilashni, shuningdek, o‘zini nafaqat ona, balki ishbilarmon ayol sifatida ham ko‘rishni xohladi. Bir kuni Kerol qizining tug‘ilgan kunini nishonlamoqchi bo‘ladi va bolalar bayramini tashkillashtirmoqchi bo‘lgan ota-onalar uchun biznesda deyarli hech qanday taklif yo‘qligini tushunib qoladi. Shunday qilib, ajoyib g‘oya paydo bo‘ldi: sharlardan tortib, chiroyli dasturxon va nafis bezaklargacha bo‘lgan hamma narsani tayyorlaydigan va sotadigan oilaviy kompaniyaga asos solindi.
Middlton xonim o‘z biznesini noldan boshladi, xaridorlar e’tiborini jalb qilish uchun minglab reklama varaqalarini tarqatdi. Ikki yildan so‘ng eri ham British Airways kompaniyasidagi ishini tashlab, xotiniga yordam bera boshladi. Biznes tezda ko‘tarilib, yaxshigina daromad keltira boshladi. Bugungi kunda ularga tegishli bo‘lgan Party Pieces kompaniyasining qiymati, taxminan, 40 million dollarni tashkil etadi. Kerol hali ham kompaniya ishlarida faol ishtirok etmoqda: “Men hozir ham ishlayman, omborimizga borishni va buyurtmalarimiz qayerga ketayotganini ko‘rishni yaxshi ko‘raman”.
G‘amxo‘r ona
Bo‘lajak qirolicha, millionerning rafiqasi va ularning onasi
Foto: AFP
Muvaffaqiyatli biznes sababli, shuningdek, Kerolning eri — Mayklga buvisidan pul meros bo‘lib qolganidan so‘ng, oilaning moddiy ahvoli ancha yaxshilandi. Keyinchalik Middltonlar farzandlariga sifatli ta’lim berishga qurbi yetishini tushunib, ularni Angliyadagi eng yaxshi xususiy maktablarga yuborishdi. Aytish kerakki, ta’limga tikilgan investitsiya behuda ketmadi — Kerol va Mayklning uch farzandi ham hayotda muvaffaqiyat qozonganlardan.
Keyt Middlton
Foto: East News
To‘ng‘ich qizi — Keyt Middlton Marlboro kollejida o‘qidi, u o‘qishdan tashqari xokkey o‘ynashni ham yaxshi ko‘rardi. Kollejni tugatgach, darhol universitetga hujjat topshirmadi: bir yil o‘qishdan tanaffus qilishni xohladi. Bu vaqt ichida u Italiya va Chiliga bordi va xayriya tashkilotining dasturida qatnashdi. So‘ngra Keyt nufuzli Sent-Endryus universitetiga o‘qishga kirdi. U yerda esa shahzoda Uilyam bilan tanishib qoldi.
2004-yilda yoshlar chang‘i uchishga chiqishganda birga suratga tushishdi: ularning munosabatlari birinchi marta matbuotda e’lon qilindi. Universitetni tugatgandan so‘ng Keyt Jigsaw kiyimlar do‘koni tarmog‘ining savdo bo‘limida ishlay boshladi. Aynan shu paytda yoshlar o‘rtasida kelib chiqqan janjal tufayli ular bir muncha vaqtga ajralishdi. Ammo hammasi yaxshilik bilan yakunlandi — 2010-yilda shahzoda Uilyamning Keyt Middlton bilan unashtiruvi e’lon qilindi va 2011-yil 29-aprelda esa uzoq kutilgan to‘y bo‘lib o‘tdi. Bugungi kunda Keyt uch nafar farzandini tarbiyalayapti va haqli ravishda Buyuk Britaniyaning sevimli malikasi hisoblanadi.
Pippa Middlton (Mettyuz)
Foto: East News
Filippa yoki uni ko‘proq Pippa deb atashadi, Edinburg universitetida tahsil olgan bo‘lib, ingliz adabiyoti bo‘yicha diplomga ega. Keyinchalik u kompaniyalarda jamoatchilik bilan aloqalar bo‘yicha mutaxassis bo‘lib ishladi va turli tadbirlarni tashkil etishda ishtirok etdi. Shuningdek, u ikkita kitob yozgan, Vanity Fair jurnali va Sunday Telegraph gazetasining muallifi ham bo‘lgan.
2017-yilda qiz sobiq poygachi va omadli tadbirkor Jeyms Mettyuzga turmushga chiqdi. Hozirda juftlik o‘g‘li Artur va qizi Greysni tarbiyalamoqda.
Jeyms Middlton
Foto: East News
Kerolning kenja farzandi Jeyms ham Edinburg universitetiga o‘qishga kirdi, lekin birinchi kursdan keyin universitetni tashlab, o‘z biznesini boshladi. U onasining pazandalik haqidagi bolalik xotiralaridan ilhomlanib, original tort tayyorlash bo‘yicha kompaniya tashkil qildi. Qizig‘i shundaki, u tort pishirishni uyidagi oshxonadan boshlagan. Tez orada Jeyms “Yilning eng yosh tadbirkori” mukofotiga sazovor bo‘ldi. Yaqinda Jeyms yangi loyiha — itlar uchun organik ozuqa ishlab chiqaruvchi kompaniyani ishga tushirdi. Shaxsiy hayotda ham omadli desa bo‘ladi: u fransiyalik moliyaviy tahlilchi Alize Tvenga unashtirilgan.
Bo‘lajak qirolning dono qaynonasi
Foto: Getty Images
Uilyam 2007-yilda Keyt bilan gaplashmay qo‘yganida, onasi qiziga eng yaxshi maslahatni berdi: “Bunaqa yig‘lab, uyda o‘tirma. Yaxshisi, o‘zingga qara, tungi klublarga bor, unga qanday qizni qo‘ldan chiqarganini ko‘rsatib qo‘y”. U, shuningdek, Keytga o‘zini tutishni va dili qanchalik qattiq og‘riganini Uilyamga sezdirmaslikni tayinladi. Onasining bu maslahatlari bekorga ketmadi: Uels shahzodasi Keytni Seyshel orollariga olib borib, “u yagona”, ekanini aytdi va kelajakda unga uylanishga va’da berdi. Keyt ham o‘z navbatida, u bunga to‘liq tayyor bo‘lguncha kutishga rozi bo‘ldi.
Biroq jurnalistlarning so‘zlariga ko‘ra, Kerol qizining barmog‘ida hali ham nikoh uzugi yo‘qligidan asabiylashgan, chunki Keyt va Uilyam bir necha yildan beri uchrashishardi. U bir marta Rojdestvo arafasida mehmonga kelgan Uilyamni chetga olib, kelajakda nima qilmoqchiligi haqida so‘ragan. Shunda shahzoda bo‘lajak qaynonasini tez orada unashtiruv va nikoh to‘yi bo‘lishiga ishontirgan.
Foto: East News
OAVning ta’kidlashicha, Uilyam Keytni sevib qolishining sabablaridan biri — uning oilasi va ota-onasi, ukasi va singlisi bilan havas qilarli munosabatlari bo‘lgan. Unga bo‘lajak rafiqasi do‘stona va ahil oilada tarbiyalangani yoqqan.
Vaqt o‘tishi bilan u ham bu oilaning bir qismiga aylandi — shahzoda qaynona va qaynotasi bilan yaxshi munosabat o‘rnata oldi. Aytishlaricha, Uilyam ularnikiga kelib yurganida, divanda Middlton xonimning tizzasiga bosh qo‘ygan holda soatlab janob Middlton bilan suhbatlashgan. Yaqinda The Sun nashrining xabar berishicha, Uilyam qaynonasini “ikkinchi ona” deb hisoblaydi. Jurnalistlar, shuningdek, Kerolning qizi va kuyoviga “katta ta’sir” o‘tkaza olishini ham ta’kidlaydi. Valiahd shahzodaning rafiqasi bo‘lganidan keyin ham Keyt onasi bilan yaqin munosabatni yo‘qotmagan va haligacha undan maslahat olib turadi. Kerolni har doim bolalariga yordam berishga tayyor, ularni qo‘llab-quvvatlovchi tirgak deb atash mumkin.
Sevimli buvi va ajoyib ayol
Foto: Getty Images
Kerolning mehri hammaga yetadi — bolalariga ham, besh nafar nevarasiga ham. Aytishlaricha, u “juda mehribon buvi”, shahzoda Jorj — Keyt va Uilyamning birinchi farzandi — Kerolga, ayniqsa, juda o‘rganib qolgan. Bolaligida buvisi uni tez-tez o‘rmonga yoki plyajga sayr qilish uchun olib borardi. Bundan tashqari, Kerol uni Norfolkdagi bolalar bog‘chasiga ham o‘zi olib borgan. Jorj, ukasi va singlisining tarbiyasida ham uning alohida o‘rni bor. Kerol o‘zini juda faol buvi deb ta’riflaydi: “Men tepaliklardan yugurishni, daraxtlarga chiqishni va o‘yin maydonchasidagi tunnel bo‘ylab emaklashni xohlayman. Ba’zida shunday qilaman ham. Biz birgalikda ovqat pishiramiz, raqsga tushamiz, velosiped minamiz”.
Foto: East News
Kerol nafaqat nabiralari uchun, balki ishi uchun ham vaqt topa oladi: “Men divanda yastanib yotadiganlardan emasman. Menda katta energiya bor va ishimdan zavqlanaman. Men juda ko‘p mehnat qilgan ota-onamga qarab ibrat olganman”.
Buvi bo‘lishiga qaramay, Kerol hozirda ham ajoyib ko‘rinishga ega. Bir paytlar dizayner Karl Lagerfeld u haqida shunday degandi: “Kerolni juda jozibali ayol deb hisoblayman. Menimcha, u ikkala qizidan ham maftunkorroq”. Chindan ham bu borada bahslashib bo‘lmaydi.
