Yakkakurash sport turining aralash turi bo‘yicha jahon chempioni Murod Xonto‘rayevni pichoqlagan shaxslarga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. Bu haqda “Kun.uz” xabar berdi.
Foto: Google images
2018-yilning 26-noyabr kuni Toshkent shahridagi “Toshkent savdo markazi” (sobiq “Turkuaz”) hududida yakkakurash sport turining aralash turi bo‘yicha jahon chempioni Murod Xonto‘rayev pichoqlab ketilgandi — deb bu haqda «Daryo» nashri xabar beradi .
Keyinchalik internetda MMA jangchisi Murod Xonto‘rayevning ofisiga uyushtirilgan hujumga oid videolar tarqaldi.
Xonto‘rayevning pichoqlanishi bilan bog‘liq holatda qator shaxslar tergovga tortilgan. Toshkent shahar Ichki ishlar bosh boshqarmasi huzuridagi Tergov boshqarmasi tomonidan O‘zbekiston Respublikasi Jinoyat kodeksining 277-moddasi 2-qismi “b, v” bandlari bilan jinoyat ishi qo‘zg‘atilgan.
O‘zbekiston Respublikasi Oliy sud matbuot xizmati vakili Aziz Obidovning xabar qilishicha, jinoyat ishlari bo‘yicha Shayxontohur tumani sudida sudlanuvchilar S. Akbarov (1990-yilda Toshkent shahrida tug‘ilgan, vaqtincha ishsiz, muqaddam sudlangan), I. Abdulahatov (1991-yilda Farg‘ona viloyatida tug‘ilgan, vaqtincha ishsiz, muqaddam sudlangan), S. Fatxullayev (1991-yilda Toshkent shahrida tug‘ilgan, vaqtincha ishsiz, muqaddam sudlangan), O. Sadikov (1985-yilda Toshkent shahrida tug‘ilgan, muqaddam sudlangan), J. Saynazarov (1988-yilda Toshkent viloyatida tug‘ilgan, muqaddam sudlanmagan), S. Vadenov (1992-yilda Toshkent shahrida tug‘ilgan, muqaddam sudlangan) va T. Azizovga (1992-yilda Toshkent shahrida tug‘ilgan, muqaddam sudlangan) nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi.
Mazkur jinoiy ish jinoyat ishlari bo‘yicha Shayxontohur tumani sudi sudyasi Akmal Ergashev raisligida hamda xalq maslahatchilari B. Muslimov va M. Mirhamidovdan iborat sud tarkibida ko‘rib chiqildi.
Sud jinoyat ishi materiallarini har tomonlama va to‘liq o‘rganib, sudlanuvchilarni O‘zbekiston Respublikasi Jinoyat kodeksining 104-moddasi (qasddan badanga og‘ir shikast yetkazish) 2-qismi “ye”, “k” bandlarida ko‘zda tutilgan jinoyatlarni sodir etishda aybdor deb topdi.
Sudlanuvchilar yuqorida qayd etilgan jinoyatni 2018-yil 26-noyabr kuni Toshkent shahri Shayxontohur tumanida joylashgan “Toshkent savdo markazi” majmuasi binosining birinchi qavatidagi “Pablo” kafesi yonidagi ofisning ichida fuqarolar M. Xonto‘rayev, S. Zunnunov va I. Saidovga nisbatan sodir etgan.
Jinoyat ishlari bo‘yicha Shayxontohur tumani sudi S. Akbarovga 6 yil 3 oy muddatga ozodlikdan mahrum qilish jazosi, I. Abdulahatovga 6 yil 3 oy muddatga ozodlikdan mahrum qilish jazosi, S. Fatxullayevga 6 yil muddatga ozodlikdan mahrum qilish jazosi, O. Sadikovga 6 yil muddatga ozodlikdan mahrum qilish jazosi, T. Azizovga 6 yil 3 oy muddatga ozodlikdan mahrum qilish jazosi, J. Saynazarovga 3 yil ozodlikdan mahrum qilish jazosi va S. Vadenovga 6 yil 3 oy ozodlikdan mahrum qilish jazosi tayinladi.
Jinoyat ishlari bo‘yicha Toshkent shahar sudiga sudlanuvchilar tomonidan chiqarilgan hukmga nisbatan berilgan apellyatsiya shikoyati qanoatlantirilmasdan va hukm o‘zgarishsiz qoldirildi.
2019-yil 22-avgust kuni jinoyat ishlari bo‘yicha Shayxontohur tumani sudida sudlanuvchilar A. Nazarov (1992-yilda Toshkent shahrida tug‘ilgan, muqaddam sudlanmagan), D. Qayumov (1991-yilda Toshkent shahrida tug‘ilgan, muqaddam sudlanmagan) va S. Ortiqovga (1992-yilda Toshkent shahrida tug‘ilgan, muqaddam sudlangan) nisbatan jinoyat ishini ko‘rib chiqish bo‘yicha ochiq sud jarayoni boshlanadi.
Ushbu sudlanuvchilarga yuqorida ko‘rsatilgan sudlanganlar bilan bir guruhda bo‘lganliklari haqida ayb e’lon qilingan.
A. Nazarov, D. Qayumov va S. Ortiqov qidiruvda bo‘lganligi va endi ushlanganligi sababli ularga nisbatan yuritilgan jinoyat ishi alohida ko‘rib chiqiladi.
Mazkur jinoiy ishni ko‘rib chiqish bo‘yicha sudda jinoyat ishlari bo‘yicha Shayxontohur tumani sudi sudyasi Abdulla Abdulxayev raislik qiladi.
